9 қарашада Қазақстанның бірқатар өңірінде нөсер жаңбыр жауып, қар мен боран, көктайғақ күтіледі. Кей аймақтарда желдің екпіні секундына 30 метрге дейін және одан да жоғары күшеюі мүмкін. Ал елдің оңтүстігінде өрт қаупі әлі де жоғары, деп хабарлайды Ulysmedia.kz.
Елордада жаңбыр аралас қар жауады. Түнде жауын-шашын күшейіп, желдің екпіні секундына 15-20 метрге жетеді.
Ақмола облысында да жауын-шашын мол түсіп, көктайғақ пен жаяу бұрқасын болады. Жолдардың кей бөліктерін тұман басуы мүмкін.
Көкшетауда түнде жаңбыр аралас қар қатты жауады.
Солтүстік Қазақстан облысында жаңбыр аралас қар жауып, кей жерлерде жаяу бұрқасын соғып, көктайғақ болады. Петропавлда аздаған жауын-шашын түсіп, тұман күтіледі.
Қостанай облысында түнде және таңертең кей жерлерде жаңбыр аралас қар жауып, көктайғақ болады.
Ақтөбе облысында да жаңбыр аралас қар жауып, желдің жылдамдығы секундына 18 метрге дейін күшейеді.
Ең қатты жел Жетісу облысында күтіледі. Алакөл маңында желдің жылдамдығы секундына 23-28 метрге, кейде 30 метрге дейін және одан да жоғары жетуі мүмкін.
Абай облысында желдің екпіні секундына 23-28 метрге, ал Шығыс Қазақстан облысында 25 метрге дейін күшейеді. Семей мен Өскеменде желдің екпіні секундына 15-20 метрге жетеді.
Жамбыл облысында да қатты жел соғады. Оның екпіні секундына 28 метрге дейін жетуі мүмкін. Таразда желдің жылдамдығы кейде 25 метрге дейін күшейеді.
Алматы облысында желдің екпіні секундына 18-23 метрге жетеді. Қонаевта да осындай ауа райы болжанып отыр. Ал Алматының таулы аудандарында жел секундына 18 метрге дейін күшейеді.
Қарағанды облысында жаңбыр жауады. Өңірдің батысы мен солтүстігінде кей уақыттарда нөсерлетеді. Қарағанды қаласында тұман түсіп, желдің екпіні секундына 20 метрге дейін жетеді.
Ұлытау облысында да жаңбыр жауады, кей жерлерде жауын-шашын күшейеді. Жезқазғанда түнде және таңертең тұман түсуі мүмкін.
Қызылорда облысының шығысында күндіз нөсер жаңбыр күтіледі.
Түркістан облысында күннің екінші жартысында жауын-шашын күшейеді. Өңірдің батысы, оңтүстігі мен таулы аудандарында нөсер жаңбыр жауып, кей жерлерде найзағай ойнайды.
Түркістан қаласында да найзағай ойнап, қатты жаңбыр жауады. Ал Шымкентте желдің екпіні секундына 15-20 метрге дейін күшейеді.
Түнде және таңертең Павлодар, Атырау, Ақтау, Орал, Қостанай, Жезқазған және Қызылорда қалаларында тұман күтіледі.
Батыс Қазақстан облысында, соның ішінде Орал қаласында көктайғақ болуы мүмкін.
Маңғыстау облысында түнде кей жерлерде жаңбыр жауады. Өңірдің батысы мен орталығында желдің екпіні секундына 15-20 метрге дейін күшейеді.
Жауын-шашынға қарамастан, еліміздің бірқатар өңірінде табиғи өрт шығу қаупі сақталады.
Қызылорда облысында, Ақтөбе мен Түркістан облыстарының кей аудандарында және Жетісу облысының шығысында төтенше өрт қаупі болжанып отыр.
Алматы қаласында, Алматы, Жамбыл, Атырау, Қостанай және Абай облыстарында, сондай-ақ, өзге өңірлердің жекелеген аудандарында өрт қаупі жоғары күйінде қалады.