«Rixos» қонақүйінің 17 қызметшісі тамақтан уланды, оның ішінде 7 адам жұқпалы аурулар орталығына түсті, деп хабарлайды Ulysmedia.kz.
Ақмола облыстық санитариялық-эпидемиологиялық бақылау департаментінің мәліметінше, қонақүй қызметшілері арасында бактериялық ішек инфекциясының 17 жағдайы тіркелген. Инфекцияны жұқтырған 17 науқастың 7-еуі Көкшетау қаласының жұқпалы аурулар орталығына жатқызылған, ал қалған науқастар амбулаторлық ем қабылдайды.
«Қазіргі кезде «Бурабай» санитариялық-эпидемиологиялық бақылау басқармасы «Rixos» қонақүйінің мейрамханасына жоспардан тыс тексеру жүргізіп жатыр. Судың, тамақ өнімдерінің және шайындылардың сынамалары алынды, зертханада тексеріліп жатыр. Сондай-ақ, қызметшілер тексеріліп, эпидемияға қарсы шаралар жалғасады», - деді Ақмола облыстық санитариялық-эпидемиологиялық бақылау департаменті басшысының орынбасары Сәуле Сәдуақасова.
Айта кетейік, бұл қонақ үй Forbes тізіміндегі олигарх Болат Өтемұратовқа тиесілі.
Бұдан бұрын Жетісуда мейрамханадағы тойға барғандар жаппай уланып қалған.