Елімізде құмар ойындар мен нашақорлыққа қарсы күрес мақсатында несие беру шарттарына өзгерістер әзірленіп жатыр, деп хабарлайды Ulysmedia.kz.
Кейбір нормативтік құқықтық актілерге ұсынылған түзетулерге сәйкес, құмар ойындарға белсенді қатысу белгілерін көрсететін қарыз алушы үшін борыштық жүктеменің ең жоғары деңгейі 0,25-ке дейін шектеледі. Осы өзгерістер бойынша мұндай қарыз алушы соңғы алты айда 300 мың теңгеден астам сомаға құмар ойындарды ұйымдастырушылардың пайдасына үштен астам төлем жасаған жеке тұлға ретінде айқындалады.
Бұл түзетулердің негіздемесі құмар ойындарға белсенді қатысатын азаматтарға несие беру шарттарын қатаңдату қажеттілігін көрсетеді.
Сонымен қатар ұсынылған өзгерістер қызметі немесе мәртебесі ақшаны жылыстату және терроризмді қаржыландыру қаупінің жоғарылауын көздейтін клиенттерді қамтиды. Олардың ішінде 10 және одан да көп төлем карточкаларын ұстаушылар, есірткінің заңсыз айналымы қаупі жоғары елдердің резиденттері, соңғы алты айда 300 мың теңгеден астам сомаға құмар ойындарды ұйымдастырушылардың пайдасына үш және одан да көп төлем жасаған клиенттер, сондай-ақ құмар ойындарға қатысуы шектелген және 21 жасқа толмаған адамдар тізімделген.
Бұл ұсынылған өзгерістер есірткінің заңсыз айналымында банк өнімдерін пайдаланумен байланысты тәуекелдерді азайту және Қазақстан азаматтары арасында ойынға тәуелділіктің (лудоманияның) дамуын болдырмау мақсатында жарияланады.
Айта кетейік, жуырда туризм және спорт вице-министрі Ержан Еркінбаев қазақстандық шенеуніктерге құмар ойын ойнауға тыйым салу ықтималдығы жайлы айтқан.
Қазақстанда құмар ойындарға тәуелді адамдар саны шамамен 36 мыңға жеткен.
Бұдан бұрын президент Тоқаев Қазақстанда құмар ойындарға қатысты шектеулерді күшейтуді тапсырған.