Өңірлерде көкөніс қорларын қалыптастыру бойынша жұмыс жүргізілгенімен, кейбір аймақтарда сәбіз, картоп, қырыққабат тапшы, деп хабарлайды Ulysmedia.kz.
Ауыл шаруашылығы министрі Ербол Қарашөкеевтің мәліметінше, бүкіл өңір 85,8 мың тонна картопқа келісімшарт жасаған. Оның ішінде келісімшарт көлемі 50-100% аралығында, яғни сары аймақта 7 өңір: СҚО, Ақтөбе, Алматы, Маңғыстау, Павлодар, Ұлытау облыстары және Шымкент қаласы бар.
Бірқатар өңірлерде сәбіз де қат өнімге айналмақ. Жалпы, өңірлер келісімшарттарының көлемі 28,8 мың тоннаны құраған. Ондағы көлемі 50%-дан 100%-ға дейінгі сары аймақта 8 өңір: Ақтөбе, Жамбыл, Алматы, Абай, Ұлытау, Жетісу облыстары, Астана, Шымкент қалалары кіріп тұр. Ал Павлодар облысы тіпті қызыл аймақта, онда келісімшарт көлемі 50%-дан да төмен.
Қырыққабат қорына келсек, өңірлердегі келісімшарт көлемі – 19,1 мың тонна. Оның ішінде келісімшарты 50%-дан 100%-ға дейінгі сары аймақта 9 өңір тұр. Олар: Атырау, Ақтөбе, Ақмола, БҚО, Павлодар облыстары, Абай облысы, Астана, Алматы және Шымкент қалалары. Бес өңір қызыл аймақта: Маңғыстау, Алматы, Жамбыл, Жетісу және Ұлытау облыстарындағы жағдай.
Қат өнімдер көкөніс қоры асып тұрған өңірлерден тасымалданбақ, сондай-ақ, жергілікті өндірушілермен қосымша келісімшарт жасау көзделген.