Қазақстандағы ірі қалалардың шетіндегі ауылдардың мәселесі бір-біріне ұқсайды – жарығы жанбай, суы өшіп, жолы жөнделмей жатады. Оған қоса мұндай ауылдарда жер учаскесі оңды-солды беріліп, арықтардың үстіне үй салынып, көктемде су тасып кететіні тағы бар. Мұндай ауылдар халқы әдетте, қалаға тіркелетіндіктен, адам санын есепке ала бюджет ақшасын бөлген шақта босағада қалып жатады. Сондай ауылдардың бірі – Астана шетіндегі Қараөткел.
Целиноград ауданындағы ауыл Астанаға шамамен 20 шақырым жерде. Ақмола облысына қарайды. Ulysmedia.kz редакциясына аталған ауылдың тұрғындары хабарласып, мәселесін көтеруді өтінген. Біз олардың проблемасы неде екенін тыңдап, оны шешудің жолдарын білу үшін әкімді де сөзге тартып көрдік.