ШҚО-да оқушыны шешіндіріп, соққыға жықты деп күдікке ілінген қыздардың бірінің анасы қызметінен кетті, деп хабарлайды Ulysmedia.kz.
Естеріңізде болса, бұдан бұрын желіде Өскемендегі сауда орталықтарының бірінде жасөспірім қыздардың өз қатарластарын ұрып-соққан, тізерлеп отырғызып, шешіндірген видеосы тарады.
Аталған оқиғаға байланысты ҚР Қылмыстық кодексінің 293-бабының 2-бөлігі бойынша сотқа дейінгі тергеу амалдары жүріп жатқанда оқиғаға қатысы бар деген күдікті қыздардың бірінің анасы жұмыстан шығып кеткені белгілі болды. YK-news.kz жазуынша, әйел Өскемен қаласының білім бөлімінде қызмет атқарған.
Құқыққорғаушы Дина Таңсәрі жасөспірімді соққыға жыққан күдіктілер жайлы тың деректерді жариялады. Оның сөзінше, бұзақылық жасаған оқушылар оқитын мектепте балалары оқитын ата-аналар олардың жауапкершіліктен жалтарып кетуі мүмкін екенін айтқан, Себебі олардың бірінің ата-аналары «жоғары қызметтерде», соның ішінде ШҚО Сыбайлас жемқорлыққа қарсы қызметте және Өскемен қалалық білім басқармасында жұмыс істейтіні айтылған еді. Алайда оқиғаға қатысты мәлімдеме жасаған ҚР Сыбайлас жемқорлыққа қарсы іс-қимыл агенттігінің ШҚО бойынша департаментінің басшысы Денис Шакенов қыз баланы ұрып-соққан жасөспірімдердің Антикор қызметкерімен туыстық байланысы барын жоққа шығарды. Ал қыздардың бірінің анасы білім басқармасында істейтіні расталды.
«Ол шынымен Өскемен қалалық білім бөлімінің қызметкері болған, бірақ өз еркімен жұмыстан босату туралы өтініш білдірді. Қызы заңсыз әрекет жасағандықтан, қазір мемлекеттік қызметте қызмет атқаруға моральдық құқығы жоқ екенін ауызша түсіндірді», - деп пікір білдірді Шығыс Қазақстан облысьық білім басқармасының басшысы Инесса Чернышева.
Оның айтуынша, ол әйел көпбалалы ана және болған жағдайдан қатты шок алған.