Мәжіліс депутаты Мұрат Әбенов Назарбаев университетінде шетелдік азаматтар үшін білім беру құны қазақстандықтарға қарағанда әлдеқайда төмен екенін мәлімдеді, деп хабарлайды Ulysmedia.kz.
Университеттің ресми сайтындағы мәліметке сүйенсек, қазақстандықтар үшін бакалавриат бағдарламасы бойынша антропологияның толық курсының бағасы 18,3 млн теңгеден асады, ал Қытай азаматтары үшін бұл сома шамамен 7,3 млн теңгені құрайды, ал Кот-д'Ивуардан келген талапкерлер үшін 3 млн теңгеден сәл асады.
- Неге шетелдіктер үшін Назарбаев Университетінде ақылы оқу арзанырақ? ЖОО-ны халықтың ақшасына салып, құрал-жабдықтарды ҚР азаматтарының салықтары есебінен сатып алды емес пе, - деп ашуланды Әбенов.
Ол дамыған елдерде, мысалы, Ұлыбританияда өз азаматтары үшін білім беру құны, керісінше, әлдеқайда арзан екенін атап өтті.
– Қазақстанда өмір сүру деңгейі біз жеңілдіктер берген мемлекеттердің көпшілігіне қарағанда нашар. Оқытушыларға қатысты жағдай да дәл сондай – шетелдік оқытушылар үшін жалақы мен әлеуметтік пакет әлдеқайда жоғары екені туралы ақпарат бар. Тіпті ғылыми жетістіктері мен біліктілігі бірдей болса да, – дейді депутат.
Өз жазбасында Әбенов ҚР Конституциясында тең еңбек үшін тең төлем болуы тиіс екенін атап өтті. Ол Жоғары білім және ғылым министрі Саясат Нұрбектен бұл мәселені шешуді сұрады.
Депутатты белгілі қазақстандық блогер Сырым Итқұлов қолдады. Ол да университеттегі оқу бағасына наразылық білдіріп, ЖОО басшылығынан шетелдік азаматтар үшін мұндай "бұрын-соңды болмаған жеңілдіктер" немен байланысты екенін түсіндіруді сұрады.
Айта кетейік, Назарбаев Университеті пен мектептері бұдан былай қоғамдық бақылауда болады.