Алматыдан Оралға бағыт алған пойыз алты сағатқа кешікті. Тасымалдаушы компания кешірім сұрап, жолаушыларға өтемақы төлеуге уәде берді, деп хабарлайды Ulysmedia.kz.
Техникалық ақау № 51 Алматы-2 – Орал бағытындағы жолаушылар пойызының алты сағатқа кешігіп келуіне себеп болды, деп хабарлады "Жолаушылар тасымалы" АҚ баспасөз қызметі.
Техникалық себепке байланысты пойыз Тобыл стансасында аялдаған.
"Ақау жойылғаннан кейін 9 желтоқсан күні сағат 02.13-те пойыз Тобыл стансасынан Орал стансасына 6.05 сағат кешігумен жөнелтілді", - деп жазылған хабарламада.
Компания қиын жағдайға тап болған жолаушыларға тегін ыстық тамақ берілгенін айтты.
"Компания келтірілген қолайсыздықтар үшін жолаушылардан кешірім сұрайды", - деп жазылған "Жолаушылар тасымалы" АҚ хабарламасында.
Компания жолаушыларды, багажды, жүк-багажды және пошта жөнелтілімдерін теміржол көлігімен тасымалдау ережелеріне сәйкес жолаушыларға қаражатты қайтару және өтемақы төлеу шаралары қолданылатынын хабарлады:
Пойызбен жүруден бас тартқандарға жол ақысы толығымен қайтарылады;
Бағдар бойынша жол жүру үзілген жағдайда жүрілмеген қашықтыққа жол жүру ақысы төленеді;
Әрбір кешіктірілген толық сағат үшін жолаушыларға 3% мөлшерінде, бірақ жол жүру құнынан аспайтын өтемақы төленеді.
Өтемақыны "Жолаушылар тасымалы" АҚ билет кассаларынан алуға болады.