Еңбек және халықты әлеуметтік қорғау министрлігінің мәліметі бойынша, маусым айында ең жоғары жалақы бас құрылысшыларға ұсынылған, деп хабарлайды Ulysmedia.kz.
Еңбек министрлігі 2024 жылдың маусым айында жұмыс берушілер 94,4 мың бос жұмыс орнын, ал жұмыс іздеушілер 88,9 мың түйіндеме орналастырғанын хабарлады.
БЕЛСЕНДІ САЛАЛАР
Министрлік дерегінше, білім беру (18,4 мың бос орын), өзге де қызмет түрлері (16,4 мың), денсаулық сақтау (8,9 мың) және құрылыс (8,5 мың) салаларындағы ұйымдар жоғары белсенділік танытқан.
ТАНЫМАЛ МАМАНДЫҚТАР
Қызметкерлер арасында ең танымал мамандықтар автокөлік жүргізушілері, медбикелер, тәрбиешілер болды. Сонымен қатар, PR-менеджерлерге, іс жүргізушілерге және автоматтандыру жөніндегі инженерлерге сұраныс артып келеді.
ЖОҒАРЫ ЖАЛАҚЫ
"Маусым айында жұмыс берушілер ең жоғары жалақыны бас құрылысшыларға (орта есеппен 662 мың теңгеден бастап), өтпе жол жұмысшыларына (612 мың теңге), сондай-ақ IT-қосымшаларды әзірлеушілерге (563 мың теңге) ұсынды", - деп хабарлады министрлік.
КІМ КӨП СҰРАҒАН?
Жұмыс іздеушілер тарапынан ең жоғары жалақыны ұшқыштар (орта есеппен 1 млн теңгеден бастап), кеме капитандары (933 мың теңге) және коммерциялық кәсіпорындардың құрылымдық бөлімшелерінің басшылары (920 мың теңге) сұраған.