Бүгін қазақтың бұлбұл дауысты әншісі Бибігүл Төлегенованың туған күні, деп хабарлайды Ulysmedia.kz.
Мәдениет және ақпарат министрлігі баспасөз қызметінің мәліметінше, Бибігүл Төлегенова – қазақ мәдениетінің шоқтығы биік тұлғаларының бірі. Әрбір әні – ұлттық рухтың, саф өнердің үлгісі.
Ол 1958 жылы Бүкілодақтық эстрада әртістері байқауының лауреаты атанды. 1967 жылы КСРО халық әртісі атағын, 1970 жылы КСРО Мемлекеттік сыйлығын, 1991 жылы Социалистік Еңбек Ері атағын иеленді.
Бибігүл Төлегенова Үндістан, Мысыр, Франция, Италия секілді елдердің сахналарында өнер көрсетіп, қазақ өнерінің мәртебесін асқақтатты.
Ұлттық өнерді әлемдік деңгейге көтерген аңыз әншінің 95 жылдық мерейтойы құтты болсын! – деп жазды министрліктің баспасөз қызметі.
Еске салсақ, бұған дейін әлемге әйгілі әнші Димаш Құдайберген Дубайдан сәлем жолдап, күні кеше алған марапатын рухани ұстазы – биыл 95 жасқа толып отырған бұлбұл әнші Бибігүл Төлегенованың құрметіне арнаған болатын.