Қолжетімділігіне қарамастан, көптеген қазақстандықтар жинақсыз өмір сүруді немесе капитал жинаудың балама жолдарын іздеуді жөн көреді, деп хабарлайды Ulysmedia.kz.
БАНК ДЕПОЗИТТЕРІНЕ ҚЫЗЫҒУШЫЛЫҚ ТӨМЕН
Зерттеулерге сәйкес, тек қана қазақстандықтардың үштен бірі банктегі депозиттерді таңдайды, ал сауалнамаға қатысқандардың төрттен бірінде мүлде жинақ жоқ.
Депозиттер ірі қалаларда танымал болып қала береді: Алматыда 42,1% азаматтың, Қарағандыда 41,9%, ал Астанада 37,4% депозит ашқан. Сонымен қатар, қазақстандықтардың басым бөлігі (85%) жинақтарын ұлттық валютада сақтауды жөн көреді, ал доллармен жинақтайтындар тек 12% құрайды.
ЖИНАҚТАУДЫҢ БАСТЫ МАҚСАТТАРЫ
Негізгі жинақтау себебі қаржылық "қауіпсіздік жастығын" қалыптастыру болып табылады — мұны сауалнамаға қатысқандардың 18,4%-ы атаған. Тағы 17,7% тұрғын баспана сатып алу үшін қаражат жинайды, ал шамамен 30% арнайы мақсаты жоқ депозит ашып, тек таныстарының үлгісін қайталаған.
ДЕПОЗИТ ТАҢДАУ КРИТЕРИЙЛЕРІ
Қазақстандықтар депозит таңдағанда негізінен пайыздық мөлшерлемеге (46,5%), қаражатты еркін алу мүмкіндігіне (35,3%) және банктің сенімділігіне (32%) мән береді. Ал жинақты банкте сақтамау себептеріне келсек, көпшілігі қолма-қол ақшаны жөн көреді, бизнеске немесе жылжымайтын мүлікке инвестиция салады, кейбірінде бос қаражат жоқ.
ДЕПОЗИТТЕРДІҢ ҚАУІПСІЗДІГІ
Депозит кепілдігі мәселесі өзекті күйінде қалып отыр: сауалнамаға қатысқандардың тек 42%-ы ғана банктердегі депозиттер қорғалғанын біледі. Егер банк банкротқа ұшыраса, салымшылар жинақтаушы депозиттер бойынша 20 млн теңгеге дейін, стандартты депозиттер мен картадағы қаражаттар үшін 10 млн теңгеге дейін, шетел валютасындағы депозиттер үшін 5 млн теңгеге дейін өтемақы алуға құқылы.