Елорданың Әзірет Сұлтан меші аумағында түсірілген бейнежазба әлеуметтік желілерде қызу талқыға түсті. Оқиға наурыздың 26-сынан 27-сіне қараған түні – қасиетті Қадір түні болған, деп хабарлайды Ulysmedia.kz .
ТОЛЫҒЫРАҚ
Бейнежазба авторының айтуынша, қасиетті Рамазан айының Қадір түнін мешітте қарсы алған астаналықтарға қаладағы мейрамханалардың бірі тегін тамақ таратқан. Алайда кәсіпкердің қайырымдылық ісі оқыс жағдаймен аяқтала жаздады. Ақысыз берілген азық-түлікке таласқан адамдар бірін-бірін таптап, жапа-тармағай сыртқа жүгірді. Кадрдан мешітке барғандардың дені жастар екені көрінеді. Абырой болғанда ешкім зардап шеккен жоқ. Дегенмен жұрттың бұл қылығы шара ұйымдастырушыларын алаңдатқаны рас. Бұл бейнежазбаны көрген желі қолданушылары: “Астанаға аштық келген бе?”, “Қадір түнінің қадірін кетірді ғой”, “Масқара, тамаққа таласып бірін-бірі таптады”, “Халық не болып бара жатыр?” деп азық-түлікке таласқан жұртты сынға алса, енді бірі “Студенттер шығар, жазғырмайық”, “Халықтың тұрмысы шынымен де нашар, ішерге ас таппай отырғандар көп қазір” деп бұқараның әрекетін түсінуге тырысты.