Шетелдік БАҚ Пхукетте қазақстандық азамат қаза тапқанын хабарлады, деп хабарлайды Ulysmedoa.kz.
МӘН-ЖАЙ
“Новости Пхукета” телеграм арнасының мәліметінше, Қазақстан азаматы жол апатынан қаза тапқан.
Оқиға 1 сәуір түнгі сағат 00:45 шамасында болған. Ер адам Bypass Rd тас жолымен мотоциклмен жоғары жылдамдықпен келе жатып, рөлге ие бола алмай, бағанаға соғылған. Ер адам оқиға орнында жан тапсырған.
Бастапқыда таиландтық билік марқұмның жеке басын анықтау кезінде оның телефонындағы орыс тіліндегі жазбаларға қарап, “Ресейден келген турист” деп болжаған. Алайда кейін марқұмның Таиландтағы аралда тұрып, жұмыс істеген Қазақстан азаматы екені нақтыланды.
СІМ
Ұлысмедиа тілшісі сыртқы істер министрлігіне бұл ақпаратқа қатысты сұрау салды.
ПХУКЕТТЕГІ ОҚИҒА
Еске салайық, 1 сәуірде Пхукет провинциясындағы Майтон аралы маңында туристер мінген катер жарылып кеткенін, бортта Қазақстаннан барған демалушылар да болғанын хабарлаған едік.
Өрт тұтанған кезде катерде үш адам – капитан мен екі экипаж мүшесі болған. Кейбір туристер бұл сәтте теңізде жүзіп жүрген. Bangkok post мәліметінше, катерде Қазақстан мен Ресейден келген туристер болған. Жалпы катер бортында 31 адам болған.
СІМ мәліметінше, катердегі жолаушылардың арасында Қазақстанның 4 азаматы болды.
- Олардың барлығы дін-аман, Таиландта демалыстарын жалғастыру туралы шешім қабылдады. Екі азаматтың паспорттары өртеніп кетті. Ертең консул оларға уақытша құжаттарды ресімдеп, содан кейін Қазақстанға орала алады, дейді СІМ ресми өкілі Айбек Смадияров.