Алматыда В. Г. Фесенков атындағы Астрофизика институтының қызметкерлері Ғылым күні жұмыстан босатылды, деп хабарлайды Ulysmedia.kz.
МӘН-ЖАЙ
Ғалымдардың кәсіби мерекесі – 12 сәуір күні жұмыссыз қалғаны туралы В. Г. Фесенков атындағы Астрофизика институтының Ай мен планеталар физикасы зертханасының меңгерушісі Виктор Тейфель хабарлады.
Оның айтуынша, институт қызметкерлері еш себепсіз жұмыстан босатылған.
ДӘЙЕКСӨЗ
— Өкінішке қарай, сіздерге жағымсыз жаңалықты хабарлауға тура келіп отыр. Біздің зертхана үшін, оның басшысы мен қызметкерлері үшін бүгін – "Помпейдің соңғы күні". Ертеңнен бастап бізді институттан аяқ асты және нақты себептерін түсіндірместен жұмыстан босатып жатыр, – деп жазды ол әлеуметтік желіде.
Ulysmedia тілшісі ғалыммен байланысқа шығып, мән-жайды анықтау үшін тиісті органдарға сауал жолдады.
АНЫҚТАМА
Виктор Тейфель — қазақстандық танымал астрофизик, ол В. Г. Фесенков атындағы Астрофизика институтының жетекші қызметкерлерінің бірі. Бұл мекеме – 1941 жылы Василий Фесенковтың бастамасымен құрылған және ҚР Аэроғарыш комитетінің жанындағы Ұлттық ғарыштық зерттеулер мен технологиялар орталығының еншілес ұйымы.