Журналист Галина Рыжкина ABR мейрамханалар желісінің иесі Асқар Байтасов өзін балағаттағанын айтты, деп хабарлайды Ulysmedia.kz.
КАФЕДЕГІ ЖАНЖАЛ
Журналистің сөзінше, жанжал алдыңғы демалыс күндері Алматыдағы Ami мейрамханасында болған. Рыжкина оның үстеліне ABR иесі Асқар Байтасовтың өзі келгенін, оны “Forbes мұқабасындағы адам әрі прогрессивті Алматының бет-бейнесі” деп атағанын айтты.
Оның айтуына қарағанда, кәсіпкер дөрекі түрде “оның әлеуметтік желіде не жазатынына бәрібір” екенін, сондай-ақ “қоғамға еш пайда әкелмейтінін” айтқан. Рыжкина бұл қорлау сөздері бүкіл мейрамхана қонақтарының көзінше айтылғанын жеткізді.
– Асқардан кейін біздің үстелге оның жары @zhamilya_abilova келді. Ол ересек адамша ақылға қонымды бірдеңе айтудың орнына, жай ғана мені “ақымақсың” деп атады, – деп жазды журналист.
ЖАНЖАЛДЫҢ СЕБЕБІ
Рыжкинаның пайымдауынша, мұндай реакция оның Байтасовқа тиесілі “Дареджани” мейрамханасының жарнамалық ролигін сынағанымен байланысты болуы мүмкін.
Ол өз жазбаларында бейнероликті “анайы” деп атап, актер Шыңғыс Капиннің грузин акцентін салып, жасанды мұрын қолданғанын атап өткен. Журналисттің айтуынша, резонанстан кейін видео желіден өшірілген.
ABR-ДІҢ ҰСТАНЫМЫ ЖӘНЕ ҚОҒАМНЫҢ РЕАКЦИЯСЫ
BES.media тілшісі ресми түсінік алу үшін ABR компаниясына жүгінген. Әуелідеде хабарламаға жауап берілмеген. Кейін қызметкерлердің бірі (лауазымын атаудан бас тартқан) бұл сауалдың “әлдекімге жолданғанын”, бірақ ресми пікірді қашан және кім беретіні белгісіз екенін айтқан.
Асқар Байтасовтың өзі де, жанжалға қатысы бар оның жұбайы да бұл жағдайға қатысты ашық түсінік бермеген. Әлеуметтік желілерде бұл жайт кеңінен талқыланып жатыр: кейбір қолданушылар ABR орындарына бойкот жасауға шақырса, енді біреулері жанжал мейрамхана иесінің бизнесіне айтарлықтай әсер етпейді деп есептеп отыр.