Талдықорған прокуратурасы қоғамдық қорлардың бірінде лицензиясыз діни білім берілгенін анықтады. Сонымен қатар қор ғимаратында тіркеусіз сегіз адам тұрған. Прокуратураның талап-арызы бойынша сот қорды лицензиясынан айырды, деп хабарлайды Ulysmedia.kz.
Прокурорлар қандай заңбұзушылықтарды анықтады
Заңбұзушылықтар діни қызмет туралы заңнаманың сақталуын тексеру кезінде анықталған. Прокуратураның мәліметінше, қор лицензиясыз діни білім берген.
Бұдан бөлек, қор ғимаратында тұрғылықты жері немесе уақытша болатын орны бойынша тіркелмеген сегіз адам тұрған. Олардың барлығы әкімшілік жауапкершілікке тартылды.
Сот қандай шешім шығарды
Прокуратура қорды лицензиясынан айыру туралы талап-арызбен сотқа жүгінген. Қор өкілі талаптармен келісіп, сот талап-арызды толық қанағаттандырды. Алайда шешім әлі заңды күшіне енген жоқ.
Контекст
Бұған дейін Оқу-ағарту министрі Жұлдыз Сүлейменова жекеменшік мектептер оқушы қыздарға хиджаб киюге рұқсат бергені үшін лицензиясынан айырылуы мүмкін екенін мәлімдеген.
Мектептерде діни киім киюге 2016 жылдан бері тыйым салынған. Алайда бұған дейін жекеменшік мектептер бұл талапты қатаң сақтай бермеген. Енді орамал тағатын қыздардың отбасы ақылы болса да, балаларын оқытатын мектеп таба алмай отыр.