Қостанай облысының қылмыстық істер жөніндегі мамандандырылған ауданаралық соты әйелі мен кәмелет жасына толмаған ұлын пышақтап өлтірген Аманқарағай ауылының тұрғынына үкім шығарды, деп хабарлайды Ulysmedia.
Мән-жай
2025 жылғы 29 қыркүйекте Аманқарағай ауылының тұрғыны түнгі уақытта өз үйінде бола отырып, жұбайын қызғанып, онымен ажырасқысы келмей, арадағы қарым-қатынасты анықтауды шешкен.
Пышақпен қаруланып, жұбайы жатқан бөлмеге бара жатқан кезде сотталушы абайсызда кәмелетке толмаған ұлын оятып алады. Ұлы оны тоқтатуға тырысқан кезде ер адам оған бірнеше рет пышақ жарақатын салған.
Осы уақытта әйелі оянып, ұлын қорғауға әрекеттенген, алайда сотталушы сол пышақпен оның денесіне бірнеше рет соққы жасаған.
Алған көптеген пышақ жарақаттарының салдарынан сотталушының кәмелетке толмаған ұлы мен оның жұбайы оқиға орнында қайтыс болған.
Мемлекеттік айыптаушы соттан сотталушыны екі жәбірленушіні өлтіргені үшін, оның бірі кәмелетке толмаған ұлы болғанын ескере отырып, кінәлі деп танып, оған қылмыстық-атқару жүйесінің төтенше қауіпсіздік мекемесінде жазасын өтеумен өмір бойына бас бостандығынан айыру жазасын тағайындауды сұрады.
Жәбірленуші қылмыстың ауырлығына қарамастан сотталушыға жеңілдік жасауды сұрады, өйткені анасы мен інісін қайтару мүмкін емес, ал сотталушы оның әкесі болып қала береді.
Сотталушы өз кінәсін толық көлемде мойындамады, сотта ұлы мен жұбайын өлтіру ниеті болмағанын, туыстарына пышақ жарақатын салу кезінде шок күйінде болғанын көрсетті.
Сот үкімі
ҚР ҚК-нің 99-бабы 2-бөлігінің санкциясы 15 жылдан бастап өмір бойына бас бостандығынан айыруға дейінгі баламасыз жаза түрін көздейді.
Сот сотталушының қылмыстық жауаптылығы мен жазасын ауырлататын немесе жеңілдететін мән-жайларды анықтаған жоқ.
Сотталушының жеке басын, жасалған әрекеттің сипаты мен қоғамдық қауіптілік дәрежесін, сондай-ақ сот талқылауы барысында анықталған мән-жайларды ескере отырып, сот оған қылмыстық-атқару жүйесінің төтенше қауіпсіздік мекемесінде жазасын өтеумен өмір бойына бас бостандығынан айыру жазасын тағайындады.