Тәжікстанда билік ұлттық мәдениетті насихаттау науқаны аясында сақал қойған ерлер мен орамал таққан әйелдерге бақылауды күшейтті, деп хабарлайды Ulysmedia.kz.
Мән-жай
«Азаттық Азияның» хабарлауынша, ел тұрғындары тексеру, ұстау және сырт келбетін өзгерту туралы талаптардың жиілегенін айтып жүр. Жергілікті тұрғындардың сөзінше, адамның қалай көрінетіні және не киетіні барған сайын мемлекет бақылауына өтіп барады.
Ұсталғаннан кейін ер адам полицияға апта сайын есеп беруге міндеттелді
Осындай жағдайлардың бірі Бохтар қаласында болған.
Сақал қойған 38 жастағы саудагер ұсталғанын айтты. Ер адам үш тәулік қамауда болып, кейін қоғамдық тәртіпті бұзғаны үшін 180 сомони, шамамен 18 доллар көлемінде айыппұл төлеген.
Оның сөзінше, бостандыққа шыққаннан кейін полиция қызметкерлері сақалын қырып жүргенін растау үшін апта сайын WhatsApp арқылы селфи жіберуді міндеттеген.
Журналистер бұл жағдайға қатысты құқық қорғау органдарынан пікір ала алмады.
Әйелдер де сырт келбетін өзгертіп жүр
Әйелдер де осындай өзгерістер туралы айтып отыр. Хатлон облысының бір тұрғыны медициналық мекемеге барған кезде қызметкер одан орамалын иегі мен мойны көрінетіндей етіп тағуды сұрағанын жеткізді.
Кейін, оның айтуынша, мектепке, ауруханаға және мемлекеттік мекемелерге барғанда киімін мұқият таңдайтын болған.
Қазір әйел діни киім ретінде қабылдануы мүмкін бір түсті қара және ақ орамалдардан бас тартып, ашық түсті, өрнекті орамал тағады.
Тыйым заңмен бекітілді
Бақылау 2024 жылы күшіне енген «Дәстүрлер мен мерекелер туралы» заңға енгізілген түзетулерге байланысты күшейген.
Құжатта билік тәжік мәдениетіне жат деп санайтын киімдерді киюге тыйым салынған.
Бұған дейін де мектептерде, жоғары оқу орындарында және мемлекеттік мекемелерде хиджаб киюге шектеу болған.
Тәжікстан билігі мұндай шаралар ұлттық дәстүрлерді сақтау және экстремизмнің алдын алу үшін қажет екенін мәлімдейді. Сонымен қатар, олар дін ұстану бостандығына шектеу қойылмайтынын атап өтеді.
Науқандар бүкіл елде өтіп жатыр
Мамырда Душанбенің бір ауданындағы әйелдер істері жөніндегі комитет ұлттық киімді насихаттауға арналған «Ауылдан ауылға» акциясын өткізді.
Шенеуніктер көшеге шығып, орамал және ұзын, кең киім киген әйелдермен әңгімелескен.
Науқанның суреттері әлеуметтік желілерде қызу талқыланып, сынға ұшырағаннан кейін өшірілген.
Сақалды ер адамдар да тексеріледі
Тәжікстанда сақал қоюға тыйым салатын жеке заң жоқ. Соған қарамастан, ел тұрғындары тұрақты тексерулер туралы айтып жүр.
Кейбір ер адамдар ұсталғаннан кейін сақалдарын мәжбүрлі түрде қырып, айып тақпастан босатылғанын мәлімдеген.
Басқа жағдайларда оларға әкімшілік құқықбұзушылық үшін айыппұл салынған.
Төлқұжат бөлімдерінің бірінде жұмыс істейтін қызметкердің сөзінше, құжат рәсімдеу кезінде сақалды ер адамдарға алдымен сақалын қыру жиі ұсынылады.
Ол сақалды ер адамдар мен діни киім киген әйелдер туралы мәліметтер ай сайынғы арнайы есептерге енгізіліп, жоғары тұрған органдарға жіберілетінін айтты.