Атырауда мұнай компаниясына 1,4 млрд теңге айыппұл салынды

Тексеру барысында не анықталды?

Облыстық экология департаментінің мәліметінше, кәсіпорында бірнеше бағыт бойынша заңбұзушылық анықталған.

Атап айтқанда, компания қоршаған ортаға шығарылатын ластаушы заттардың рұқсат етілген көлемінен асырып жіберген және кейбір жұмыстарды қажет экологиялық рұқсатсыз жүргізген.

Сонымен қатар, тексеріс барысында топырақтың мұнай өнімдерімен ластанғаны және қалдықтарды басқару кезінде талаптардың сақталмағаны белгілі болды.

Бұдан бөлек, ағын суларды бақылау, экологиялық мониторинг жүргізу және кәсіпорынның есептілігін тапсыру мәселелеріне қатысты да заңбұзушылықтар анықталған.

Айыппұл көлемі 1,4 млрд теңгеден асты

Тексеру қорытындысы бойынша компанияға жалпы 1 млрд 433,8 млн теңге айыппұл салынды.

Қазір оның 21,9 млн теңгесі өндірілген. Ал қалған 1 млрд 411,9 млн теңге көлеміндегі айыппұлды кәсіпорын сотта даулауға тырысқан.

Алайда бірінші және апелляциялық сатыдағы соттар компанияның талабын қанағаттандырмады.

Егер белгіленген мерзімде айыппұл төленбесе, қаражат мәжбүрлі түрде өндірілетін болады.

Бұған дейін директор пара беруге әрекеттенгені үшін сотталған

Бұған дейін «Потенциал Ойл» компаниясының бас директоры Ғабиден Қарамолдин осы экологиялық тексеріске қатысты қылмыстық істің фигуранты болған.

Сот материалдарына сәйкес, кәсіпорын басшылығы анықталған заңбұзушылықтар мәселесін 15 млн теңгеге шешуге әрекет жасаған.

Қарамолдин пара беруге оқталғаны үшін кінәлі деп танылып, оған 270 млн теңге айыппұл салынды.

Компания инженері Жанар Исабаева да осы іске көмектескені үшін дәл осындай көлемде - 270 млн теңге айыппұл арқалады.

Іске қатысы бар тағы екі адам алаяқтық жасауға оқталғаны үшін кінәлі деп танылып, әрқайсысына 2,5 жылға бас бостандығын шектеу жазасы тағайындалды.

«Потенциал Ойл» Қазақстанда 2000 жылдан бері жұмыс істейді. Компанияның негізгі қызметі - шикі мұнай мен ілеспе газ өндіру.