Атырау тұрғыны соққыға жығылған бейтаныс ер адамды «бауырым» деп таныстырып, онымен бірге жедел жәрдем көлігіне мініп ауруханаға барған. Кейін науқастың заттарын ұрлап кеткен. Артынша оның бұған дейін де дүкенді екі рет тонағаны белгілі болды, деп хабарлайды Ulysmedia.kz.
Мән-жай
«Ақжайық» мәліметінше, техника дүкенінде бірнеше адам бір ер адамды жерге құлатып, соққыға жыққан. Мұны көрген өтіп бара жатқан адам жедел жәрдем шақырған.
Дәрігерлер келген кезде әлгі адам кенет өзін зардап шеккен азаматтың ағасы ретінде таныстырған. Соққыға жығылған ер адам есін білгенімен, алған жарақаттарының салдарынан сөйлей алмай, фельдшерлерге бұл кісіні алғаш рет көріп тұрғанын айта алмаған.
Сөйтіп, бейтаныс адам жәбірленушімен бірге жедел жәрдем көлігіне отырып, облыстық ауруханаға барған.
Ауруханада заттар ұрланған
Науқасты аурухана ішіне кіргізіп жатқан кезде оның «ағасы» iPhone 13, AirPods, рюкзак және 25 мың теңгесін алып, кетіп қалған.
Келтірілген жалпы шығын 382 мың теңгеге бағаланды.
Кейін бұл оның алғашқы ұрлығы емес екені анықталды. Бұған дейін ол сол Sulpak дүкеніне артқы есігі ашық тұрған сәтте екі рет кірген.
Алғашқы жолы құрал-саймандарды алып шығып, оларды соңғы аялдамада тұрған адамдарға сатып жіберген. Екінші рет ақылды колонка мен компьютер тінтуірлерін ұрлап, оларды да өтіп бара жатқан адамдарға өткізген.
Сотта атыраулық барлық ұрлықты мойындады. Ол бұл әрекетке ішімдікке ақша керек болғандықтан барғанын айтқан.
Ер адам бұған дейін де ұрлық үшін сотталғандықтан, сот қылмыстың қайталануын ескеріп, оны төрт жылға бас бостандығынан айырды.
Сонымен қатар, сотталған адам дүкен иесіне 243 272 теңге, ал соққыға жығылған ер адамға 382 мың теңге өтемақы төлеуге міндеттелді.