28 қыркүйекте Қазақстанда ауа райы күрт құбылады. Синоптиктердің болжамынша, елдің солтүстігі, шығысы мен орталығында үсік жүреді, оңтүстікте жаңбыр мен найзағай күтіледі. Кей өңірлерде жел күшейіп, шаңды дауыл тұрады, деп хабарлайды Ulysmedia.kz.
Түнде ауа температурасы -3 градусқа дейін төмендейді
Ақтөбе, Қарағанды және Шығыс Қазақстан облыстарында үсік күтіледі. Кей жерлерде ауа температурасы -3 градусқа дейін төмендеуі мүмкін.
Абай, Павлодар, Ақмола, Солтүстік Қазақстан және Қостанай облыстарында түнде -2 градусқа дейін суытады.
Астанада топырақ бетінде -2 градусқа дейін үсік күтіледі. Павлодар мен Петропавлда шамамен -1, Көкшетауда -2, Өскеменде -1-ден -3 градусқа дейін төмендеуі мүмкін.
Оңтүстікте жаңбыр мен найзағай болжанды
Түркістан облысының батысы мен солтүстігінде, сондай-ақ, таулы және тау бөктеріндегі аудандарда жаңбыр жауып, найзағай ойнайды.
Шымкентте де күндіз жаңбыр жауып, найзағай күтіледі.
Жамбыл облысының таулы аудандарында жауын-шашын мен найзағай болжанған. Түнде облыстың солтүстік-батысында да жаңбыр жауады.
Қызылорда облысының орталығы мен оңтүстігінде жаңбыр мен найзағай күтіледі. Қызылорда қаласында күн ішінде мезгіл-мезгіл жауын-шашын болуы мүмкін.
Шаңды дауыл және қатты жел тұрады
Түркістан облысының солтүстігінде күндіз шаңды дауыл күтіледі.
Қызылорда облысының орталығында дауыл тұрып, шаң көтерілуі мүмкін.
Ақтөбе, Түркістан, Қарағанды, Ақмола, Қостанай, Солтүстік Қазақстан облыстарында, Ұлытау облысында және тағы бірнеше өңірде желдің екпіні секундына 15–20 метрге жетеді.
Ең қатты жел Жетісу облысында күтіледі. Өңірдің шығысында жел екпіні секундына 23–28 метрге дейін күшеюі мүмкін.
Бірнеше өңірде тұман түседі
Түнде және таңертең Ақтөбе, Павлодар, Қарағанды, Ақмола, Шығыс Қазақстан, Солтүстік Қазақстан және Қостанай облыстарында, сондай-ақ Ұлытау облысында тұман күтіледі.
Павлодар, Өскемен және Петропавл қалаларында да тұман түсуі мүмкін.
Өрт қаупі жоғары
Елдің кей өңірінде жоғары және төтенше өрт қаупі сақталады.
Әсіресе Түркістан, Қызылорда, Жамбыл облыстарында, Ұлытау облысында, сондай-ақ, Ақтөбе, Қарағанды, Ақмола, Атырау және басқа облыстардың жекелеген аудандарында жағдай күрделі болады.
Жетісу облысында төтенше өрт қаупі кемінде 30 қыркүйекке дейін сақталады.