Әлеуметтік желілерде танымал имам, дінтанушы, психолог Нұрлан Байжігітұлы елордадағы Ырыскелді қажы атындағы мешітке бас имам боп тағайындалды, деп хабарлайды Ulysmedia.kz.
Имам бұл жаңалықты өзінің әлеуметтік желідегі парақшасында мәлім етті.
“Бісмілләһир-Раxманир-Раxим! Алланың қалауымен, елдің ақ тілегімен бүгін Астанамыздағы “Алланың гүлі” аталып кеткен Ырыскелді қажы атындағы мешітке бас имам боп тағайындалдым. Бұл мен үшін қуанышты жаңалық! Енді Астана жұртшылығымен және қала қонақтарымен осы мешітте жүздесеміз. Еліміз тыныш, жұртымыз аман, бірлігіміз берік, руханиятымыз тұғырлы болсын”, – деп жазды ол.
Айта кетейік, бұған дейін Нұрлан Байжігітұлы Алматы облысындағы “Зәм-зәм” мешітінің бас имамы болды.
Нұрлан Байжігітұлы – белсенді блогер. Instagram-да оған 613 мың адам, TikTok-та 494 мың адам жазылған. TikTok-та оның жарияланымдары төрт миллионнан астам лайк жинаған.
Нұрлан имам өзінің блогында күнделікті мәселелер бойынша кеңестер береді, сонымен қатар шариғат заңдарын заманауи тілмен түсіндіреді.