Бір күн бұрын ресейлік Polymetal компаниясы Джерси аралынан Қазақстандағы "Астана" халықаралық қаржы орталығына (АХҚО) қайта тіркелуді аяқтады, деп хабарлайды Ulysmedia.kz.
1 тамызға дейін Polymetal акциялары Лондондағы биржада, Қазақстандағы қор биржасында және Мәскеу биржасында сатылды.
"Компания қазір өзінің премиум листингі Қазақстанда екенін растайды. AIX-те (Астана қор биржасында) сауда-саттықты қайта бастау туралы компания барлық техникалық рәсімдерді аяқтағаннан кейін жарияланады", - делінген хабарламада.
Polymetal – кәсіпорындары Ресей Федерациясы мен Қазақстанда орналасқан, алтын мен күміс өндіретін ресейлік компания.
Естеріңізге сала кетейік, 2022 жылдың шілдесінде Polymetal ресейлік активтерді сату жоспарлары туралы мәлімдеді. 2023 жылдың мамырында АҚШ компанияны санкциялар тізіміне енгізді. Сол айдың соңында Polymetal акционерлерінің көпшілігі (91,78%) компанияны Қазақстанда АХҚО-ға қайта тіркеуге дауыс берді. Маусым айында Polymetal оның басшылығы санкцияларға байланысты ресейлік бөлімшеден кететінін мәлімдеді.