Бүгін түстен кейін марқұм Салтанат Нүкенованың әпкесі Айнұр Нүкенова жауап берді. Ол Қуандық Бишімбаев пен Салтанат Нүкенова неге мешітте екі рет діни жолмен неке қиғанын айтып берді, деп хабарлайды Ulysmedia.kz.
Неге екінші рет неке қиып жатырсыңдар?
Адвокаттардың сұрақтарына жауап берген Айнұр Нүкеноваға Бишімбаев үш рет талақ берген соң мешітте екінші рет неке қиғанын айтты.
– Мен олар неге екінші рет неке қиып жатырсыңдар деп сұрадым. Ол кезде үш рет талақ айтылатынын білмеген де екем. Павлодарға кетіп қалған кезде ол (Бишімбаев) үш рет талақ берген. Сол үшін олар екінші рет неке қидыруды жөн деп шешкен екен, – деді ол.
Айнұр Нүкенова сонымен қатар, ешқашан ақша сұрамайтын Салтанат бір рет 50 мың теңге сұрағанын жеткізді.
Бишімбаевтың ісі
Еске сала кетейік, Астана қаласының қылмыстық істер жөніндегі ауданаралық сотында экс-министр Қуандық Бишімбаевтың ісі бойынша алдын ала тыңдау 11 наурызда басталды. Прокурор экс-министр ісінің мән-жайын айтып берді.
Ал Бишімбаев тағылған айыпты мойындамай, ашық сот өткізуді сұрайды. Оған "қинау" (110-баптың 2-бөлігі) және "аса қатігездікпен адам өлтіру" (99-баптың 2-бөлігі) баптарымен айып тағылған. Бұған қоса, Астанадағы "Гастро-орталық" директоры, Бишімбаевтың туысы Бақытжан Байжанов Салтанат Нүкенованың өліміне байланысты іс бойынша "қылмысты жасырды" деген күдікпен сотқа тартылып жатыр.
12 наурызда экс-министр Қуандық Бишімбаевтың ісі бойынша алдын ала тыңдау жалғасты. Бұл жолы да журналистер сот залына кіре алған жоқ. БАҚ тарапының базынасын сот қызметкерлері тыңдаған болғанымен, ешбір журналист сот залына кіре алмаған. Тіпті тілшілер полиция шақырып, сот әкімшілігі ақпарат алу құқығынан айырып отырғаны жөнінде арыз жазуына тура келген.
4 сәуір күнгі сотта Қуандық Бишімбаевтың адвокаты Лейла Рамазанова бүгінгі сотқа Салтанат Нүкенованың денесіне жасалған сараптаманы жарамсыз деп тану қолайсыз деп тану жөнінде өтініш білдірген. Судья бұл өтінішті қанағаттандырудан бас тартқан. Ал Бишімбаевтың өзі тергеу изоляторында өз-өзіне қол жұмсамақ болғанын мәлімдеді.
Прокурор Айжан Аймағанова Қуандық Бишімбаевтан ұрып-соққан жұбайына жедел жәрдем шақырудың орнына неге көріпкелге қоңырау шалғанын сұраған. Бишімбаев “бұл менің үлкен қателігім болды” деп жауап берді.
Алдын ала тыңдаудан кейінгі соттарға журналистер кіруге мүмкіндік алды. Сот барысы Қазақстан Республикасының Жоғарғы сотының ресми сайтынан тікелей эфирден көрсетіледі.