Ішкі істер министрлігі заңсыз айналымнан қаруды, оның ішінде қаңтар оқиғасы кезінде ұрланған қару-жарақты тауып, тәркілеу бойынша жұмыстар жүргізді, деп хабарлайды Ulysmedia.kz.
МӘН-ЖАЙ
Жедел-іздестіру іс-шаралары барысында полицейлер бірнеше облыстың аумағында қару жасырылған төрт орынды тапты. Олардың үшеуінде қаңтар оқиғасы кезінде ұрланған қару-жарақ пен оқ-дәрілер анықталды.
ЖАРКЕНТ
Жаркент қаласының маңында қараусыз қалған ғимаратта Remington 11-87 маркалы тегіс ұңғылы мылтық табылып, тәркіленді (қаңтар оқиғасы кезінде ұрланған).
ЖАМБЫЛ ОБЛЫСЫ
Жамбыл облысы Бірлесу ауылының шетінде қару жасырылған жер табылды, онда Benelli моделінің тегіс ұңғылы мылтығы (қаңтар оқиғасы кезінде ұрланған), қос ұңғылы аңшы мылтығы, қол гранатасы және төрт патрон тәркіленді.
Сонымен қатар, Жаңатас қаласының жанында тегіс екі ұңғылы мылтық, газ тапаншасы және үш оқ-дәрі жасырылған орын анықталды.
АЛМАТЫ ОБЛЫСЫ
Алматы облысындағы кенттердің бірінде арықтан әртүрлі калибрлі екі аңшы мылтығы (олардың бірі қаңтар оқиғасы кезінде ұрланған), жарық-шу гранатасы, АК-74 магазині, жеті патрон және қара тактикалық бетперде табылды. Нөмірлер жойылған қару-жарақ пен оқ-дәрілерге қатысты қосымша тексерулер жүргізіледі.
Соңғы үш жылда жедел іс-шаралардың, тінту мен рейдтердің арқасында түрлі 8 119 қару, 845 граната, 114 мыңнан астам оқ-дәрі табылып, тәркіленді. Сондай-ақ қару жасырылған 738 орын табылды.