Астанада жеке стоматологияда үш жасар қыздың қаза болуына қатысты іс бойынша сот жалғасуда. 27 қарашадағы отырыста анестезиолог баланың жағдайы нашарлаған сәтте неге бірден жедел жәрдем шақырмағанын түсіндірді, деп хабарлайды Ulysmedia.kz.
ТОЛЫҒЫРАҚ
Қайғылы оқиға 2024 жылдың 30 қазанында болған: үш жасар қыз анестезиямен жасалған тіс емінен кейін оянбаған. Әкесінің айтуынша, жоспарланған үш сағаттың орнына процедура үш жарым сағаттан артыққа созылған. Бұған дейінгі сот отырыстарында ол дәрігерлердің баланың 18 тісін бірден емдеуді шешкенін, ал оны бірнеше кезеңге бөлуге болатынын айтқан.
ТЕК АНЕСТЕЗИОЛОГ ЖАУАП БЕРІП ЖАТЫР
Бұл іс бойынша айыпталушы ретінде тек анестезиолог қарастырылып отыр. Ал ем жасаған стоматолог сотқа тартылмаған. Іс Қазақстан Республикасының Қылмыстық кодексінің 317-бабының 3-бөлігі бойынша қаралуда: «Медицина қызметкерінің кәсіби міндеттерін тиісінше орындамауы салдарынан абайсызда адамның өліміне әкелу». Анестезиолог төрт жылға дейін бас бостандығынан айырылуы немесе шектеу жазасына кесіліп, үш жылға дейін белгілі бір қызметтерді атқару құқығынан айырылуы мүмкін.
ЖЕДЕЛ ЖӘРДЕМ КЕЙІН ШАҚЫРЫЛҒАН
25 қарашадағы сот отырысында бейнебақылау жазбасы көрсетілді. Кадрларда 30 қазанда қыздың ата-анасымен бірге сағат 09:30 шамасында клиникаға келгені көрінеді. 13:49-да қызды ояту басталған, ал 14:02-де монитор жүрек ритмінің бұзылғанын және қарыншалардың фибрилляциясын тіркеген.
Бүгінгі отырыста 14:03-тен бастап бейнежазба қаралды. Онда анестезиолог баланың жағдайы күрт нашарлағанын байқап, 14:05-те жедел жәрдемге емес, әріптесі – реаниматологқа қоңырау шалғаны көрінеді.
«Біз бірге кардиохирургиялық орталықта жұмыс істегенбіз. Қазір ол да реаниматолог болып істейді. Мен оны көмекке шақырдым, себебі бір реаниматолог жалғыз өзі толық реанимация жасай алмайды. Әрқашан екінші маман қажет», – деді айыпталушы.
Судья «Неге бірден жедел жәрдем шақырмадыңыз?» деп сұрады. Анестезиолог «Жедел жәрдем құрамында реаниматолог болмайды. Олар тек науқасты жеткізеді. Біз кәсіби, кеңейтілген реанимация жасап жатқан едік, ал жедел жәрдем тек фазалық көмек көрсетеді» деп жауап берді.
14:07-де анестезиолог дефибрилляторды қолына алғаны бейнежазбадан көрінді. Прокурор аппараттың басқа бөлмеден әкелінгенін, ал ережеге сай ол әр кабинетте болуы тиіс екенін айтты. Кадрларда құрылғының қолданылмағаны, тіпті жерге түсіп қалғаны байқалады.
Айыпталушы сол сәтте дефибрилляторды қолдануға болмайтынын түсіндірді:
«Ол кезде жүрек тоқтап қалған еді. Ритм болмағандықтан, дефибрилляторды қолдануға болмайды. Әйтпесе күйік іздері қалып, кейінгі сараптамада ол ақау болып көрінер еді. Жүрек тоқтаған кезде дефибриллятор қолданылмайды», – деді ол.
Тек 14:10-да клиника әкімшісі бөлмеге кіріп, жедел жәрдемге қоңырау шалды. Айыпталушы клиника реанимобиль сұрағанын, бірақ 14:16-да дәрігер мен фельдшер келгенін айтты.
14:34-те анестезиолог ата-анасына жағдайды түсіндірген. 15:05-ке дейін жедел жәрдем бригадасы мен клиника қызметкерлері – шамамен бес адам – жүрекке массаж жасап, дәрі-дәрмек енгізіп, жүрек қызметін қалпына келтіруге тырысқан.
Прокурордың айтуынша, сот-медициналық сараптама деректеріне сәйкес, қыздың өлімі 14:23-те тіркелген.
Сот процесі жалғасуда.