Сайлау күні дауыс берген бюллетеньнің суретін жариялаған алматылық жауапқа тартылды, деп хабарлайды Ulysmedia.kz.
Мән-жай
Бас прокуратураның мәліметінше, дауыс берілген бюллетеньнің фотосы немесе видеосы және оларды тарату да үгіт-насихат ретінде бағалануы мүмкін екенін атап өтті.
– Алматы тұрғыны Қазақстан Республикасының Әкімшілік құқықбұзушылық туралы кодексінің 102-бабы бойынша жауапқа тартылды, ол өз кінәсін мойындап, жазбасын өшірді. Осыған байланысты біз заңды сақтауға тағы да шақырамыз, – деді Бас прокуратура өкілі Ерлан Жанпейсов.
Дауыс беру күні сайлауға қатысушыларды қолдап үгіт жүргізуге, сондай-ақ, толтырылған бюллетеньнің фото немесе видеосын жариялауға болмайды.
Сайлау учаскелері жабылғанға дейін қоғамдық пікір сауалнамаларының нәтижелерін және сайлау қорытындысына қатысты болжамдарды таратуға да тыйым салынады.
Мұндай сауалнамаларды сайлау учаскелерінің өзінде өткізуге де рұқсат жоқ.
Сайлау заңнамасын бұзғаны үшін әкімшілік айыппұл қарастырылған.
Бас прокуратураның мәліметінше, осы уақытқа дейін дауыс беру барысында елеулі заңбұзушылық тіркелмеген.
Сайлауға қатысты прокуратура органдарына арыз-шағым түспеген. Соттарға да талап-арыз берілмеген.
Бүгін Қазақстанда Құрылтай депутаттарын сайлау өтіп жатыр. Сайлау учаскелері сағат 07:00-де ашылды. Сағат 16:00-дегі мәлімет бойынша, елдегі сайлауға қатысу көрсеткіші 65,37 пайыздан асты.