The Ritz-Carlton, Astana алғаш рет қонақүйдің экологиялық жауапкершілік және орнықты даму саласындағы өлшемшарттарға сәйкестігін растайтын Green Кey халықаралық сертификатына ие болды. Сертификат тәуелсіз аудит нәтижелері бойынша беріледі, ал талаптар қызметкерлерді оқыту және тарту, қонақтарға ақпарат беру, қалдықтарды басқару, сондай-ақ өнім берушілермен өзара іс-қимыл жасауды қоса алғанда, қонақ үй жұмысының түрлі аспектілерін қамтиды, деп хабарлайды Ulysmedia.kz.
– Green Key халықаралық экологиялық сертификатын алу қоршаған ортаны қорғай отырып жоғары деңгейде қызмет көрсетуге болатынының дәлелі екенін растады. Біз үшін бұл – The Ritz-Carlton философиясының табиғи жалғасы, әрбір қабылданған шешімнің негізінде қоршаған ортаға қамқорлық жасау жатады, – дейді The Ritz-Carlton, Astana бас менеджері Кәрім Таяч.
Green Key талаптарының бірі – табиғи ресурстарды жауапкершілікпен пайдалану. The Ritz-Carlton, Astana қонақүйінде аумақты суару үшін қала құбырымен келетін су пайдаланылмайды. Қонақ үйдің инженерлік жүйесін жаңартқаннан кейін бұл мақсатқа жаңбыр суы мен ғимараттың инженерлік жүйелерінің жұмысы кезінде пайда болатын конденсат қолданылады. Жиналған су арнайы резервуарда жиналып, содан кейін жас көшеттерге күтім жасау үшін пайдаланылады. Бұл шешім қалалық ресурстарды қоршаған аумаққа зиян келтірмей пайдалануға мүмкіндік береді.
Экологиялық қағидаттар қызметкерлердің күнделікті жұмысына да қатысты. Команданың әрбір жаңа мүшесі бірінші жұмыс күнінің өзінде-ақ орнықты даму қағидаттарымен танысады, содан кейін жыл сайын тиісті дайындықтан өтеді. Осылайша, экологиялық жауапкершілік қызмет стандарттарымен қатар бейімделу бағдарламасының бір бөлігіне айналады.
– Біз үшін бұл – бір департаменттің ғана жауапкершілігі емес, бүкіл қонақүй командасының күнделікті жұмысы. Айдың әр бірінші сейсенбісінде әртүрлі бөлімшелер өкілдерінің қатысуымен орнықты даму мәселелері бойынша кеңестер өтеді. Онда біз жаңа бастамаларды талқылаймыз, нәтижелерді талдаймыз және су тұтынуды үнемдеу, қалдықтарды азайту, жабдықтауға жауапкершілікпен қарау, климаттық бастамалар мен экологиялық сертификаттауды дамыту сияқты негізгі бағыттар бойынша шешімдер қабылдаймыз. Сондай-ақ, азық-түлік қалдықтарын азайту мақсатында аптасына екі рет қызметкерлер үшін Zero Waste Day өткізіледі, – дейді Кәрім Таяч.
Тағы бір бағыт – бір реттік пластикті пайдалануды азайту. Қонақ үйдегі мейрамханалар мен барларда сусындар шыны ыдыспен беріледі, ал пластикалық түтіктер қағаз түтіктермен ауыстырылған. Бөлмелерде қонақтар QR коды арқылы сүлгілер мен төсек-орын жабдықтарын қайта пайдалану бағдарламасына өз бетінше қосыла алады. Мұндай таңдау суды, электр энергиясын және жуғыш заттарды тұтынуды азайтуға септігін тигізеді.
Қонақ үй өнім берушілерге ерекше назар аударады. The Ritz-Carlton, Astana жергілікті өндірушілермен бірлесіп жұмыс істейді, бұл өнімді тасымалдау қашықтығын қысқартуға және сонымен қатар қазақстандық бизнесті қолдауға мүмкіндік береді.
– Біз серіктестеріміздің өз қызметіне экологиялық жауапты тәжірибелерді енгізу тәжірибесін бағалаймыз. Бұл тәсіл жеткізілімдердің неғұрлым тұрақты тізбегін құруға және қонақүйдің өзінен әлдеқайда тыс экологиялық бастамалардың әсерін кеңейтуге мүмкіндік береді, – дейді Кәрім Таяч.
Осылайша, Green Key процестердің тұтас кешенін бағалауды көздейді, сондықтан оған ие болу жүйелік тәсілді талап етеді. Экологиялық қағидаттар жеке жобалар түрінде емес, түрлі қызмет салаларына енгізілуі тиіс.