Түнімен Берлиннен Мюнхенге жол жүрдік. Журналистер мен операторлар тынымсыз күннен кейін шаршағанымен, жүздерінен болып жатқан оқиғаларға деген ықыласты аңғармау мүмкін емес. Таңертең жұмысымыз Мюнхен әуежайында жалғасты. Алда дамылдауға мұрша бермейтін жаңа бағдарлама күтіп тұрды.
Тоқаевтың қарқынына ілесу оңай емес. Мұны сапарды бірге жүріп, сапар барысын ақпараттандырып жүргенде ерекше сезінесің: бір кездесуден кейін екіншісі жалғасады, саяси келіссөздерден соң өнеркәсіп өкілдерімен кездесу, одан кейін парламент, форум. Бәрін түсіріп, оқырманға жедел жеткізіп, түсіндіруге тиіспіз. Ал президент әр жолы жаңа тақырыпқа көшіп, тыңғылықты дайындық пен тың уәжді қажет ететін нақты әңгімеге кірісуі қажет.