Мыс қазіргі экономиканың негізгі материалдарының біріне айналып келеді. Электр энергетикасы, көлік, байланыс, тұрмыстық техника, компьютерлер, электромобильдер, жаңартылатын энергетика – осы бағыттардың барлығының дамуы металға деген сұранысты арттырып отыр. Шикізат қоры мол Қазақстан үшін бұл жаңа мүмкіндіктерге жол ашады.
Алайда бүгінде мәселе елдің қанша мыс өндіре алатынында ғана емес. Өндірістік тізбектің және соның нәтижесінде қалыптасатын қосылған құнның қандай бөлігі ел ішінде қалатыны да маңызды. Сондықтан сарапшылар қауымдастығында шикізаттық модельден мысты терең өңдеуге көшу мәселесі барған сайын жиі талқыланып жатыр.