Орталық Азиядағы екі ықпалды әулетті құдандалы еткен дүбірлі той 30 тамызда өтті. Ташкенттегі JW Marriott қонақүйінде Қырғызстанның бұрынғы кеден қызметі басшысының орынбасары Райымбек Матраимовтың ұлы Аймен мен қазақстандық мұнай магнаты Жақып Марабаевтың немересі Самира некесін қиды.
Ресейлік эстрада жұлдыздары ән шырқаған, ығайлар мен сығайлар бас қосқан той аты дүркіреп тұрған екі әулетті туыс етті. Бірі – контрабандаға қатысты ауқымды зерттеулерден, АҚШ-тың «Магнитский тізімі» бойынша санкцияларынан және Бішкектегі активтерінің тәркіленуінен өткен Матраимовтар әулеті. Екіншісі – Қазақстанның мұнай-газ саласының қалыптасуының бастауында тұрған Марабаевтар әулеті.
2022 жылғы Қаңтар оқиғасынан кейін Қазақстандағы ескі элитаға қысым күшейді. Деолигархияландыру, активтерді қайтару және монополияларды жою науқаны басталды. Алайда бұл дауыл Марабаевтар әулетін айналып өткендей. Атышулы отбасы уақыт талабына сай бағыт-бағдарын өзгерте білді: мұнай ұңғымалары порттарға, мұнай саласындағы лауазымдар халықаралық консалтингке ұласты, ал бұрыннан бар активтері мен байланыстары логистика және инфрақұрылым саласында жаңа тыныс алды.
Ulysmedia.kz Марабаевтардың кім екенін, мұндай ықпалға қалай ие болғанын, Жақып Марабаев туралы америкалық дипломаттар жабық жеделхаттарында не жазғанын анықтауға тырысты. Біз оның «ҚазМұнайГаздан» не себепті кеткенін және неге дәл қазір бұл әулеттің Матраимовтармен құдандалы болғанын зерттедік.