2011 жылғы Жаңаөзендегі оқиға қантөгіспен аяқталды. Сол тұста наразылық білдіргендер ереуілге шығуға биліктің өзі итермелеп, арандатқан деп есептейді. Әлбетте, ол тұста ереуілдің соңы оқ атуға, қамауға барады деп ешкім болжамаған-тын.
Саясаттанушы Ғалым Ағелеуов сол кезде Жаңаөзен оқиғасының бел ортасында болған адам. Ол ереуілдің хроникасын жүргізіп, қанды оқиғадан кейін соттарға қатысқан. 12 жылдан кейін саясаттанушы Жаңаөзендегі оқиға – қазақ халқының мүддесін мүлде елемеген ескі биліктің саясатының салдары деп есептейді. Ulysmedia.kz порталының бас редакторы Самал Ибраеваға берген сұхбатында Ғалым Ағелеуов 2011 жылы 16 желтоқсанда не болғанын және өлімге қатысты ресми статистика не себепті шынайы сандармен сәйкеспейтінін түсіндіріп көруге тырысты.