Аптаның соңы қайғылы оқиғамен ұласты. Қазанның 28-і Қазақстанның тарихында тағы бір қаралы күні болып қаларын кім білген?! Қарағанды өңіріндегі үздік деген Костенко шахтасындағы апаттың салдарынан 42 кенші бақилық болды. Бірнеше кенші әлі күнге дейін жер астында. Іздеу жұмыстары жүргізіліп жатыр. Апат болған сәтте жер астында 252 кенші болған. Төтенше жағдай сол баяғы «АрселорМиттал Темиртау» акционерлік қоғамына қарасты учаскеде тіркелді. Президент бүкіл еліміз бойынша 29 қазан - Жалпыұлттық аза тұту күні етіп жариялады.